Bye Bye 小器鬼

小器鬼 ，你已經離開半年有多 ， 希望你喺另一個世界努力學習 ，希望有緣再見。

回港記 2018

2018年尾，返港差唔多成個月。今次去香港同以往唔同，因為今次係香港同已經走咗嘅仔女做法事。如果佢哋兩個係人世，我日子會過得開心好多。

隨咗做法事，今次仲約以前一個lecturer食飯。佢唔提起都唔知佢就快退休。時間真係過得快，當年佢教我時得三十幾歲，仲好後生，不經不覺佢都就退休。

返港前，諗住去位於九龍所謂祖屋，同自己以前係香港時關係密切嘅地方行下，同搭天星小輪，點知最後邊度都無去。

松鼠

啱喏上網知道兩星期之前，有隻松鼠係地鐵車廂周圍走，啲女乘客驚到跳起。我真係覺得啲女仔好白痴。松鼠條尾比老鼠粗，根本好難搞錯。我不知幾鍾意松鼠，不時買啲nuts引佢哋去我屋企個後花園。

.............................................

【爆相爆片】百厭松鼠仔搭港鐵順風車 乘客驚到彈起	50,695
建立時間 (HKT): 0926 19:10

究竟係香港「鼠患」真係咁嚴重，定又係早前颱風「山竹」吹冧晒啲樹，帶嚟嘅後遺症？大家唔使咁驚，因為今次講緊嘅唔係老鼠，而係松鼠。話說周日（23日）有市民喺港鐵站裏面，見到有隻松鼠出沒，隻松鼠仲同其他乘客一齊搭車，不過佢就坐唔定喺車廂內亂咁走，嚇到其他人彈起仲咿嘩鬼叫，場面一片混亂。

市民翁先生向《蘋果》爆片，話佢家姐喺周日下晝2點幾乘搭港鐵荃灣綫，其間列車由長沙灣駛緊去荔枝角站途中，列車上突然有隻嘢喺車廂內走嚟走去。當時好多乘客都未睇清楚係咩嚟，有人以為係大老鼠，但見到隻嘢全身毛鬙鬙亂咁走，好多人都嚇餐飽，之後睇清楚先知道原來係隻松鼠嚟。

從翁先生提供嘅短片睇到，當時車廂內唔少乘客爭相走避，好多女乘客仲俾隻松鼠嚇到尖叫。不過睇嚟隻松鼠都好驚，佢可能見到港鐵車廂逼爆晒人，俾人嚇到佢周圍走。翁先生引述佢家姐話喎，「當時好刺激，車廂啲人個個嚇到縮起隻腳，有啲仲嚇到跳起身，好似玩人浪咁！」不過就冇人夠膽捉隻松鼠，結果要交畀港鐵職員處理。

另一名市民梁先生亦喺荔景站拍到呢隻松鼠，可以見到隻松鼠喺荔景站往中環方向嘅車頭月台位置，不斷爬嚟爬去好似想匿埋咁，但佢爬上去月台幕門角落頭又走返落地，都搵唔到地方捐到入去。

有女乘客喺月台見到有松鼠覺得好出奇，有小朋友就覺得隻松鼠好得意。咁啱當時列車準備開走，月台幕門開住仲響起嘟嘟聲，有廣播叫啲乘客「請勿靠近幕門」，隻松鼠就臨尾走咗上車，佢都好規距冇衝門，如果唔係夾住就唔知點算嘞。

港鐵回應指，當日下晝近3點，接獲乘客報告發現松鼠，車站職員喺長沙灣上車搜查，並無發現，當列車駛至中環總站，職員再登車作徹底檢查，同樣無發現。

小記畀咗條片嘉道理農場嘅專家，證實佢係赤腹松鼠(Callosciurus erythraeus)，但單憑條片就唔可以肯定佢係咪野生，而大鬧港鐵站，同近日打風塌樹有冇關，專家都話難以判斷喎！

根據漁護署嘅記錄，本港係有野生松鼠嘅，而赤腹松鼠係外來物種，引入後在本土繁殖及建立族群，最後更成為本港嘅野生動物，亦係香港常見嘅品種，佢哋分佈喺大欖、城門同大埔滘等新界地區，港島大潭同薄扶林等亦有佢哋嘅蹤影。

不過，小記亦要提提大家，咪因為松鼠咁得意而帶返屋企養，因為佢哋係受「野生動物保護條例」保護，任何人除按照特別許可證行事外，不得狩獵、故意干擾及管有或出售任何受保護野生動物，一經定罪，最高可被判罰款10萬元及監禁1年。

好耐無寫blog!!!

心血來潮睇番個blog，原來成兩年無寫……

兩年前入咗M公司有兩年多，個時仲希望係M做十年，依家我只係想下年轉工，離開依間濕鳩顧問公司。依間衰嘢，每年人工加得2至4%。通脹都2至3%，咁即係無乜加人工。依家人工得£47000，繼續留係度，我理想嘅£52000人工都唔知幾時有。

過去兩年得兩件事係開心。第一我終於買到一間freehold嘅屋，有自己花園。第二樣嘢係，間屋大咗，多咗地方，可以收集更多毛公仔。

39th and 10th Birthdays

五尾係我同High Profile Panda生日. 今對生日對我同熊貓仔都好特別, 因為我最後一年係三字頭, 而熊貓仔今年歲.

熊貓仔生日好易記, 因為我係十年前, 五月尾個bank holiday,係一間Piccadilly Circus附近餐廳買番黎.

個蛋糕最後有九成俾隻小器鬼自己食左. 

熊貓仔兄弟

回程

放完大假由香港番英國, 頭幾日都成日掛住香港, 不過過左幾日, 日日番工忙到死, 乜野都唔記得.

回程個時, 小器鬼唔信自己個小器肚子唔受得生冷野, 空姐派雪糕, 佢又要埋一份, 搞到個小器肚子痛. 依隻野永遠都係為食累事.

Teresa

公司前一排黎左個一年internship嘅鬼妹仔叫E, 本來無乜特別, 因為依個世界上, 一個人唔係男就係女.

依個鬼妹仔特別之處, 係個樣好似我十幾年前鍾意過嘅一個捷克女仔叫Teresa. 金色頭痛加藍色眼睛真係好靚. 本來都有幾會發展落去, 不過佢係暑假之後要返捷克讀大學, 所以唔可以一齊, 依家諗起都可惜. 如果無記錯, 佢今年應該三十一歲左右, 鬼仔鬼妹大得好快, 依家係街撞見, 我都未必認得佢.